6
La 17-an de julio, en Palacio de Convenciones, kiu estis la Kongresejo de la 95a U K, ni ricevis, post
longa vico, la kongresajn dokumentojn. Dum la vojo al la giĉeto por ricevi ilin kaj dum la atendado,
ni havis eblecon saluti plurajn amikojn kaj konatulojn de pasintaj UK, tio kio ĉiam estas tre agrabla
parto de la internaciaj eventoj.
Tralegante la kongresan programon mi jam konstatis la multnombrajn kunsidojn kaj variajn
programerojn, do, mi jam pensis ke kiel okazas en ĉiu UK oni ne povas ĉion partopreni. Venas la
malfacila momento elekti.
Interesa estis la Movada Foiro kun multaj standoj el diversaj naciaj, regionaj kaj fakaj asocioj, kiujn
oni starigis en la granda halo.
La 18-an okazis la Solena Inaŭguro de la Kongreso en Salono Zamenhof. Post bonvenigaj vortoj de
la Prezidanto de UEA, S-ro Probal Dasgupta, kiuj prezentis la podianojn, sekvis bela kaj sentema
paroladeto de la Prezidanto de LKK S-ro Hernández, invitante la gekongresanojn ĝui la Havanon kaj
la kongreson.
Profitante la tagon de Nelson Mandela, S-ro Vergara legis tekston per kiu Esperanto aliĝas al tiu
speciala Tago, starigita de UN ĝuste por ĉiu 18-a de julio, kaj li promesis sendi mesaĝon al Nelson
Mandela. Ankaŭ li havis gratulajn sentojn por la unuafojaj kongresanoj, kiuj ĉijare estis multnombraj,
ĉar junaj latinamerikaj esperantistoj havis ĉifoje okazon ĝui la Universalan Kongreson. Sekve, S-ro
McGill, Prezidanto de ILEI menciis la ILEI Kongreson okazinta en Matanzas, kaj S-ro Osmo Buller
anoncis la novan estraron. Sekvis la salutoj de reprezentantoj de Landaj Asocioj, salutante nome de
Hispanio, Rafaela Urueña, kiu, laŭ propono de Vergara, saluti ĉiuj en la propra lingvo, per difinita
frazo, ŝi salutis kastil-lingve per la jena frazo: “el hombre es un ser sociable por naturaleza y libre
de ir de un lugar a otro. El derecho de comunicación es un derecho natural y principio de
solidaridad”, de Francisco de Vitoria, Patro de la Internacia Juro.
Post diversaj kantoj de junulara kuba koruso finiĝis la inaŭguro.
Posttagmeze, Dro Tonkin, rektoro de Internacia Kongresa Universitato (IKU) prezentis la
prelegontojn, kiuj, skize, prezentis la temojn de iliaj prelegoj, kaj sekve li mem prelegis pri
Shakespeare kaj la paralelismo inter li kaj Zamenhof kiel aŭtoro de Esperanto; ĉar ambaŭ transiris la
limon de iliaj naskiĝurboj kaj fariĝis universalaj.
Je la 5-a mi ĉeestis al prelego de S-ro Besada pri Kubo. Li elstarigis la personojn kiuj kontribuis al la
nacia propra kuba kulturo. Félix Varela, Manuel Zequeira, Gertrudis Gómez de Avellaneda ktp, kiuj
antaŭenigis la filozofion de la moderneco. Fine vespere, en la Teatro Mella okazis la Nacia arta
vespero.
La 19-an, kadre de la Kleriga Lundo okazis la Kunsido pri UN kaj Unesko prezidate de D-ro Tonkin.
En la sino de IKU prelegoj, la vico estis por mi mem, kiu prelegis pri la “Protektado de la Medio kaj
daŭropova evoluo”, ĉar ĉijare mi decidis prelegi en IKU kaj en du sesioj de AIS.
Vespere, mi vidis la Kabaredon, bela spektaklo en kiu ni ĝuis diversajn dancojn kaj muzikojn tipe
kubajn.
7
Marde, mi partoprenis duontagan ekskurson tra la spuroj de Hemingway: Finca Vigía, tre interesa
loko ĉirkaŭata de arboj kaj floroj, kie, klarigatan de spertulo, ni vidis ĉion. Oni konservas la domon
kie loĝis tiu fama romanisto dum li vivis en Havano. Oni gardas ankaŭ lian ŝipon per kiu li tre ofte
iris tra la maro. Kurioza afero estas ke la hispanoj komprenis dufoje la klarigojn de la spertulo: unue
en hispana lingvo kaj poste la tradukon en esperanto. Sekve ni veturis al Monumento de Hemingway
en Cojimar, al vendejo de famaj cigaroj Romeo y Julieta, kaj vizitis la faman trinkejon “Floridita”
kie ni gustumis daikirion.
Vespere, ni ĉeestis al la akcepto kiel membroj de la Societo Zamenhof, en Hotelo Palco.
Merkrede, estas tradicia tago por ekskursoj en la UK. Mi ekskursis al fama strando Varadero, kiun
vere ni ne vidis bone kaj ŝajnis al ni ne tre interesa ekskurso.
La 22-an okazis kunsido de la Esperanta Jura Asocio, kiun mi prezidis kaj kie mi disdonis al la
ĉeestantaj juristoj, ekzemplerojn de nia revuo “Jura Tribuno Internacia”, eldonita de José Mª
Rodríguez, en Córdoba. En tiu kunsido oni devis elekti novan estraron kaj mi estis elektita
Prezidanton.
Tiu sama tago, mi devis prelegi en la sino de AIS (Akademio pri Sciencoj de San Marino) pri la
tutmonda klimatŝanĝo, temo, kiun mi konsideras tre aktuala kaj grava.
La akcepto de la Alta Protektanto de la UK, Vicministro pri Kulturo de Kubo, en la internacia salono
de hotelo Riviera, kunigis multajn kongresanojn kiuj estis regalitaj per abunda bufedo, kaj fine, per
specialaj autobusoj ni estis kondikitaj al Teatro Nacional kie okazis la “Canto general” de Neruda-
Theodorakis. Per la samaj aŭtobusoj ni estis veturigitaj al niaj diversaj hoteloj.
La sekvantan tagon, denove mi prelegis en AIS, ĉifoje pri “La akvo fonto de vivo, fonto de
konfliktoj”, ankaŭ aktuala kaj grava problemo pri la manko de akvo en multaj partoj de nia planedo,
kiu povas konduki al multnombraj konfliktoj kaj eĉ al militoj. Poste, mi ĉeestis al la amuza kvizo
gvidate de Prof. Tonkin, ĉiam sprita.
Fine la 24-an estis la Solena Fermo. Post la kutimaj prezentadoj de la podianoj, multaj el ili
membroj de la nova estraro, kaj informoj pri la premiitoj en la belartaj konkursoj, venis la transdono
de la flago al la prezidantino de la estonta UK en Kopenhago. La Fermo finiĝis per la dankvortoj de
la Prezidanto de LKK kaj donaco de floro al ĉiu membro de la Organiza Komitato, kiuj ĉifoje estis
multnombraj.
Do, tre interesa kongreso, kie krom la ekstera varma temperaturo, ni ĝuis la ĝentilecon kaj afablecon
de la kuba popolo. Kiel en pasintaj UK ni ĉiam gardos la rememorojn pri la babiladoj kun niaj
gekonatulojn kaj, inter tiuj, kortuŝa estis por ni la fakto ke meksikiaj sinjorinoj parolis al ni pri nia
forpasinta komuna amiko Julio Argüelles, tiel konata en la Universalaj Kongresoj pro sia
esperantismo kaj gaja karaktero, revante tra la mondo pri Asturio.
M. Rafaela Urueña
Prof. Tonkin, rektoro de I K U, (Internacia Kon-
gresa Universitato) prezentas la prelegantinon.
La Prezidanto de UEA (maldekstre) dankante la salut-
vortojn de la Alta Protektanto de la UK, Vicministro pri
Kulturo (dekstre).
